Lungphunlian khaw daiah mihring ruhro thahnemtak hmu chhuak

by News Editor

Tualchhung News

ZORAM TODAY| 30th July, 2024 (Tue) : Khawthlir News chuan Champhai district-a Lungphunlian khaw dai-ah mihring ruhro ṭhahnemtak hmu chhuah a nih thu a tarlang.

Khawthlir News tarlan danin, heng ruhro te hi Lungphunlian atanga hmar lam kilometre 2 vela hla Kanghmun pukah Lengteng Wildlife Sanctuary-a Wildlife Guard, Pu Lalropuia'n nimin khan a hmuchhuak a. Ruhro hmuhna puk hi Feet 12 vela thuk, Feet 40 vela sei niin, a sang lai berah Feet 18 vela sang a ni a; tun hma lamah pawh helai chhehvelah hian ruh them hmuh tawh thin ni mah se, ramsa ruhro emaw tiin enchian leh ngaihsak zui a hlawh ngai lo.

Nimin khan Lengteng Wildlife Sanctuary-a Wildlife Guard, Pu Lalropuia chu he puk chhungah hian lutin mihring khabe ruh a hai chhuah hnuah ngal ruh, ha leh lu ruh thahnem tak a hai chhuak zui a; ruhro bakah hian Hlum bel, belthleng leh thir te pawh a hai chhuak a ni. Ruhro hmuh a nih thu hi Lungphunlian VC leh YMA hruaitute hriattir nghal an ni a, heng ruhrote hi khawih chhet theih loh tura venhim nghal a ni.

Lungphunlian khaw kiang Kanghmun-ah hian tun hmain mihring an cheng tawh thin a, kum 1912 leh 1915 vel khan a khaw puma a kan avangin Lungphunlian khaw hmunah hian an insawn ni-a sawi a ni.